Baraawe (Caalamka.net) – Madaxweynaha Dowlad-goboleedka Koonfur Galbeed Mudane Cabdicasiis Xasan Maxamed Laftagareen iyo Wafdi uu hogaaminayo ayaa maanta gaaray magaalada Baraawe ee caasimada maamulka Koonfur Galbeed, halkaasi oo si diiran loogu soo dhaweeyay.
Madaxweynaha iyo wafdigiisa ayaa waxaa garoonka diyaaradaha magaalo xeebeedka Baraawe kusoo dhaweeyay Gudoomiye ku-xigeenka 2-aad ee Baarlamaanka Dowlada Koonfur Galbeed, Gudoomiyaha Gobolka Shabeelaha Hoose,Maamulka Caasimada Baraawe iyo qeybaha kala duwan ee bulshada.
Ujeedka socdaalka Madaxweyne Lafta-gareen ee degmada Baraawe ayaa lagu sheegay inay tahay qaban-qaabinta doorashada guddoomiyaha Baarlamaanka Koonfur Galbeed, maadaama guddoomiyahoodii Cali Saciid Fiqi uu kamid noqday Xildhibaannada Golaha Shacabka.
Lafta-gareen ayaa sidoo kale inta uu ku sugan yahay Baraawe waxa uu kulamo kala duwan la qaadan doona maamulka degmada, saraakiisah ciidamada ATMIS iyo kuwa dowladda iyo sidoo kale qeybaha kala duwan ee bulshada magaalada.
Safarka madaxweynaha dowlad-goboleedka Koonfur Galbeed ee Baraawe ayaa kusoo aadaya xilli degmadaasi ay saameyn xooggan ku yeelatay abaarta, ayna kusoo barakaceen dad horleh oo kasoo cararay Khawaarijta, islamarkaana ay dowladda halkaasi u dirtay shixnado mucaawino ah.
Si kastaba, Lafta-gareen ayaa muddooyinkii dambe ku sugnaa magaalada Muqdisho, isaga oo ka qeyb-galay shirka Golaha Wadatashiga Qaranka oo lagu gaaray heshiisyo dhowr ah, oo durba wajahaya mucaaradad xooggan.
