Addis Ababa (caalamka.net) – Dowladda Itoobiya ayaa war kasoo saartay weerarkii maanta barqadii ay kooxda Al-Shabaab ku qaaday saldhiga ciidankeeda ee magaalada Doolow ee gobolka Gedo.
Itoobiya ayaa sheegtay in ciidankan oo aan ka tirsanayn howl-galka Midowga Afrika ee ATMIS oo saldhiggoodu yahay Doolow ay ka fashiliyeen weerar naftii halignimo ah oo kooxda Al-Shabaab ay la damacsanaayeen inay ka geystaan saldhiga ay halkaasi ku leeyihiin ciidanka.
“Itoobiya ayaa ku guulaysatay inay fashiliso weerar ay kooxda argagixisada ah ee Al-Shabaab ku doonayeen inay ka fuliyaan magaalada xuduudka Itoobiya iyo Soomaaliya ee Doolow,” ayaa lagu yiri qoraal kasoo baxay wasaaradda arrimaha dibadda Itoobiya.
Sidoo kale waxaa qoraalka lagu yiri “Ciidamada Difaaca Qaranka Itoobiya ayaa ka hortagay raggii weerarka soo qaaday ka hor inta aysan dhibaato geysan.”
Dhinaca kale, Sarkaal sare oo ka tirsan ciidanka xoogga dalka oo la hadlay warbaahinta dowladda Soomaaliya ayaa sheegay in Al-Shabaab ay saldhigga ciidanka Itoobiya ku weerareen laba gaari oo uu midkood ahaa Surf, kuna qarxay afaafka hore ee saldhigga.
Qaraxaan ayaa sababay dhaawaca afar askari oo ka tirsan ciidanka Itoobiya, sida laga soo xiganayo sarkaalkan la hadlay warbaahinta dowladda.
Ciidanka ayaa sidoo kale toogasho ku dilay wadihii gaariga labaad, kaasi oo ku qarxay meel ka durugsan saldhigga, mana geysan wax khasaare ah, sida uu sheegay sarkaalka sare ee ka tirsan ciidanka xoogga dalka.
Ciidanka Itoobiya ee maanta la wareeray ayaa waxay dowladd Soomaaliya ka taageerayaan cirib-tirka kooxaha argagixisada, waxayna qeyb ka yihiin qorshaha dowladda ee wejiga labaad ee dagaalka Al-Shabaab ka dhanka ah ee looga xoreynayo dalka.
Si kastaba, Weerarkan ayaa kusoo imanaya, maalmo uun kadib markii ay kooxda Al-Shabaab weerar cag-marin ah ku qaadeen saldhig ay ciidanka Uganda ku leeyihiin magaalada Buulo Mareere ee Shabeelaha Hoose.
