Muqdisho (caalamka.net) – Gudddoomiye ku-xigeenkii hore ee amniga iyo siyaasadda ee gobolka Banaadir, Cali Cabdi Wardheere (Cali Yare) ayaa weerar culus ku qaaday Xildhibaan Cabdullahi Aadan Kullane oo ka tirsan golaha shacabka.
Cali Yare ayaa ka fal-celiyay qoraal uu Kullane soo dhigay bartiisa Facebook, kaasi oo uu ku sheegay in gobolka Gedo aysan suurtagal aheyn in loo gacan geliyo Jubbaland.
“Nin kasta iyo koox kasta oo ku hamineysa ama haatan ku hawlan in ay gobol weynaha Gedo, ku dirqiyaan, ku jajuubaan ama tooda mutuxan u meeriyaan; waxaan leeyahay hays lugoynina,” ayuu Kullane ku yiri qoraalka.
“Sina Suurtagal uma aha umana noqon doonto in Gedo la muquuniyo. Shalay bay ahayd oo lasoo tijaabiyey iyadoo la wato dawladdo shisheeye oo cudud ciidan ka joogto Jubbaland sidoo kale xadka ugu dheer la wadaaga Gedo, waana socon wayday.”
Cali Yare ayaa Kullane ku eedeeyay inuu isagu qeyb ka yahay heerka ay Gedo taagan tahay maanta, isaga oo usoo jeediyay “inuu cafis waydiisto reer Gedo,” uuna qaddiyadeeda ugala sinaaddo Soomaalida kale.
Hoos ka aqriso qoraalka Cali Yare Cali oo dhameystiran;
Ruuxkasta oo indheergaradka Gedo ka tirsan oon kulannay waxay si aan kala qeybsanaan laheyn oo tiiraanyo laga dheehan karay iigu sheegayeen mahadhooyinka iyo fashilkii uu saaxiibkeeyga qoraalkaan qoray u horseeday reer Gedo iyo siyaasaddii dowladdii Madaxweyne Farmaajo ee wajahneeyd gedo.
Waaba amakaage saakay waxaan aqrinayaa isagii oo ku baroor darsanaya dadkii uu heerka ugu hooseeya oo uu gaarsiiyay.
Tan ugu sahlan ee tusaalaha loogu soo qaadan karo ay aheyd; in kuraastoodii uu nin Axmed Madoobe la dhaho oo reer kale ah uu ku soo qorto Teendho xuduudka Kenya ku taalla.
Inta xog-ogaalka ah waxay iiga marqaati-furi doonaan in sababta 16-kaas Kursi loo dhaafsaday ay aheyd helitaanka hal kursi oo aanay reer Gedo laheyn, kuna abtirsan.
Waana isla kursigii sababay inuu burburo shirkii Dhuusamareeb oo hadana nasiib darro markale sii sababay inuu dhinto xiriirkii xariirta ahaa ee Madaxweyne Farmaajo iyo Madaxweyne QoorQoor, heer uu Madaxweyne QoorQoor u diido Madaxweyne Farmaajo musharixii uu kursigii beeshiisa hoose ee reer Dalal xildhibaannimada la jeclaa oo ahaa ruug caddaa siyaasadeed oo heer ku-sime Ra’isalwasaare gaaray
Si kale haddaan u dhigo, waa kursigii dartiis uu Madaxweyne Farmaajo ku waayay kursigiisii madaxweynennimo waxaana tusaale u ah inuu kursigaas dartiis ku waayay 16 kursi oo Gedo ah iyo 31 Kursi oo Galmudug ah (47 COD).
Hal talo ayaan xildhibaanka siin lahaa, taas oo ah “Intii horana cafis waydiiso reer Gedo, hadana ha uga sii darin ee adiga iyo xildhibaanka Seylac matala u sinnaada qadiyadda Gedo.”
