Muqdisho (caalamka.net) – Magaalada Muqdisho ee caasimada Soomaaliya waxaa maanta si rasmi ah uga furmay shirka wadatashiga ee u dhexeeyo madaxda dowladda federaalka Soomaaliya iyo madaxdii hore ee dalka, kaas oo socon doono muddo 3 cisho ah.
Shirkan oo ah mid xasaasi ah ayaa waxaa daah-furay madaxweyne Xasan Sheekh Maxamuud, waxaana ka qayb-galaya Madaxweyne Shariif Sheekh Axmed, Guddoomiye Shariif Xasan Shiikh Aden R/W Cabdiweli Maxamed Cali Gaas, R/W Cumar Cabdirashid, R/W Xasan Cali Khayre, R/W ku-xigeen Ridwan Xirsi Maxamed, Wasir Cabdinuur Shiikh Maxamed iyo xildhibaan Cabdulqadir Cossoble Cali.
Sidoo kale waxaa maanta lagu kordhiyay xubno horleh oo ay kamid yihiin Maxamed Xuseen Rooble, Cali Maxamed Geedi, Prof Maxamed Sheekh Cismaan Jawaari iyo Maxamed Mursal Sheekh Cabdiraxmaan. Waa laba ra’iisul wasaare oo hore iyo laba guddoomiye baarlamaan oo hore.
Inta uu socdo shirka waxaa si gaar ah diiradda loogu saarayaa dhameystirka dastuurka, dimuqoraadiyeynta, doorashooyinka, dib u xoreynta dalka iyo guud ahaan siyaasadda.
Haddaba sidee looga fal-celiyay shirka u furmay madaxda DF iyo kuwii hore?
Qaar kamid ah shacabka Soomaaliyeed, gaar ahaan kuwa isticmaala baraha bulshada ayaa si weyn uga hadlay shirkan oo ku soo aaday xilli xasaasi ah.
Dadweynaha ayaa qaarkood si wey u boggaadiyay shirweynahan, iyaga oo ku amaanay madaxweyne Xasan Sheekh, halka kuwa kalena ay dhaliileen shirka:- waxayna yiraahdeen.
Maxamed Xuseen Waliyow wuxuu yiri “Mahadsanid Mudane Madaxweyne in aad ka dhabeyneyso halku dhigaagi ahaa Soomaali Hishiis ah dunidane hishiis la ah.”
Ridwaan Axmed Nuur ayaa isna soo dhoweeyay shirka “Waa tallaabo wanaagsan in waayo araga siyaasadda wax laga weydiiyo xaalada taagan iyo tallaaboyinka xiga sida ugu haboon ee loo qadi karo. Madaxweyne Hassan Sh Mohamud Guul.”
Wiil kale oo lagu magacaabo Maxamed Zuu ayaa naqdiyay shirka, wuxuuna yiri “Kan shir ma’ahan ee waa dad isku caraysan oo midba midka kale iska ilaalinayo”.
Ibraahim Maxamed Cismaan ayaa isagana ku jawaabay “Mar haddii miiska la wada fahdhiyo waa wax fiican. Waddanka guul ayaan u rajeynaya”
Dhankiisa Cabdinajiib Sheekh Cabdullahi ayaa su’aal ka keenay maqnaashah Farmaajo, wuxuuna yiri “ Maxamed Cabdullahi Farmaajo ayaa ka maqan shirka maxaa dhacay hee?
Cabdiraxmaan Khaalib ayaa isna rajo xumo ka muujiyay shirka “Kulankan wax ahmiyada ma lahan Madaxweynaha uun baa raba inuu culaysyada saran isaga dajiyo oo indhaha shacabka ka leexiyo khilaafka iyo jahwareerka ka taagan haayadaha kala duwan ee dowladda”.
