Muqdisho (caalamka.net) – Xarunta wasaaradda arrimaha dibadda xukuumadda federaalka ah ee Soomaaliya ayaa laga jartay korontadii, sida uu maanta shaaca ka qaaday xildhibaan Aweys Maxamed Cumar oo ka tirsan xubnaha Golaha Shacabka Soomaaliya.
Xildhibaanka oo maanta ka hor ka hadlayey Golaha Shacabka ayaa sheegay in todobaadkii hore xarunta wasaaradda arrimaha dibadda gebi ahaan laga soo goostay korontadii, kadib markii ay iska bixin wasaaraddu kharashaadkii korontada, sida uu hadalka u dhigay.
Sababta waxa uu ku sheegay in ay yar tahay miisaaniyadda ay hesho wasaaradda arrimaha dibadda oo uu tilmaamay in aysan ku filneyn.
“Hadda isbuucii hore gudihiisa wasaaradda arrimaha dibadda korontadaa laga jartay, marka budget ma helaan” ayuu yiri Xildhibaan Aweys Maxamed.
Xildhibaanka oo sidoo kale kamid ah guddiga arrimaha dibadda ee Golaha Shacabka ayaa sheegay in wasaaradda arrimaha dibadda ay ka miisaaniyad yar tahay wasaaradaha kale ee dalka, isaga oo tilmaamay inay hesho 9 milyan halka kuwa kalena ay helaan ilaa 18 milyan.
Sidoo kale wuxuu intaasi ku daray in loo baahan yahay in arrintan wax laga qabto, maadaama wasaaradda arrimaha dibadda ay tahay miraayadda dalka.
“Wasaaraddaan waa miraayaddii dalka miisaaniyaddeydana sidaas ayay tahay halka wasaaradaha kale ee aan safar galeyn uu budget-koodu yahay 18 milyan, tana ay tahay 9 milyan, maxaa xal u heysaan?” ayuu markale hadalkiis sii raaciyay xildhibaan Aweys.
Hadalkan ayaa kusoo aadayo, ayadoo horay ay hadal heyn xoogan uga dhalatay korontada laga goostay wasaaradda arrimaha dibadda, waxayna dadku su’aallo ka keeneen sida ay adeeg koronto isaga bixin weysay mid kamid wasaaradaha muhiimka ah ee dowladda.
