Garbahaarey (caalamka.net) – Qaar kamid ah shacabka ku dhaqan gobolka Gedo oo kulan isugu yimaaday ayaa si adag uga hadlay dhibaato ay Kenya ku heyso gobolkaasi, gaar ahaan duqeymaha ay ka fuliso halkaasi, siiba deegaanka Ceel Cadde ee gobolka Gedo.
Suldaan Maxamuud oo kamid waxgaradka Ceel Cadde ayaa ka hadlay dhibaatada ka jirta halkaasi, wuxuuna sheegay in 10 sanno ka badan ay Kenya duqeyneyso degmadaasi, isla-markaana ay waxyeelada ugu badan soo gaarto dadka shacab ah ah ee ku dhaqan Gedo.
Sidoo kale wuxuu ku eedeeyay dowladda Kenya ay Gedo ay ka dhigtay meel ay ku tijaabiso diyaaradaha dagaalka ee ay soo iibsato, sida uu hadalka u dhigay.
“Dowladda Kenya diyaarado casri ah ayay soo gadataa meel ay ku tijaabiso ayay weysay waxay noqotay marka inay ku tijaabiso gobolka Gedo oo daris la ah. Dhibaatooyinka hadda soo noq noqday oo ay ugu dambeysay degmada Ceel Cadde waad ogtihiin inta dhimashadu gaartay carruur iyo dad da’ ah iyo hantida badan oo burburtay” ayuu Suldaan Maxamuud
Waxaa kale oo uu Suldaanku ku dhawaaqay in reer Gedo looga baahan yahay inay tashadaan, kadibna ay iska dhiciyaan Kenya, si looga hortago xadgudubyadeeda.
“Cabasho miyaan ku jireynaa ilaahey sow rag nagama dhigin inaan iska celino ayaa loo baahan yahay cabasho waxba ma tareyso” ayuu mar kale yiri Suldaanka
Sidoo kale wuxuu intaasi ku daray “Rag aan is deyno ayuu kuugu daayaa ee idaa kuuguma daayo, Kenya duqeynta waa naga joojin weysay waxaa la rabaa inaan iska dhicino reer Gedow.
Ugu dambeyn dowladda federaalka ayuu ugu baaqay inat garab istaagto reer Gedo, isla-markaana ay jawaab rasmi ah ka bixiso tallaabooyinka Kenya.
Hadalkan ayaa kusoo aadayo, ayada oo todobaadyadii lasoo dhaafay duqeymo ka dhacay Gedo ay khasaare xoogleh kasoo gaareen qaar kamid ah shacabka ku dhaqan gobolkaasi.
