Nairobi (caalamka.net) – Dowladda federaalka Soomaaliya ayaa markii u horeysay ka hadashay waxa ka jira warar sheegayay inay dhiggeedda Kenya ka wada-hadlayaan murankii badda ee kal hore ay maxkamadda caalamiga ah ee ICJ u xukuntay Soomaaliya.
Hadal-haynta arrintaan ayaa soo baxday kadib markii madaxweynaha Kenya laga soo xigtay in Jabuuti ay dhex-dhexaadinayso deriska ay saaxiibada yihiin, ee uu u dhexeeyo muranka badda.
Hadalka madaxweyne Ruto ayaa loo fahmay inuu jiro dedaal xal looga gaarayo arrintaasi kadib markii ay Kenya diiday go’aankii maxkamada caalamiga ah ee ICJ.
Dowladda Soomaaliya ayaa waxba kama jiraan ku sheegtay in Kenya ay kala hadlayaan arrintaasi, iyada oo wasiiru-dowlaha arrimaha dibadda ee Soomaaliya Cali Cumar Maxamed (Cali Balcad) uu guddiga baarlamaanka u qaabilsan arrimaha dibadda u xaqiijiyay arrintaas.
“Dacwada badda maxkamad ayey ku dhamaatay, meel looga noqdana ma laha, madax-banaanida dhulkaasna Soomaaliya ayaa loo xukumay,” ayuu yiri wasiiru-dowlaha arrimaha dibadda ee Soomaaliya Cali Cumar Maxamed (Cali Balcad).
Sidoo kale waxa uu si cad u sheegay in marnaba laga wada-hadli doonin lahaanshaha badda la xukmiyay, “Waxyaabo kale oo ah sidii loo fulin lahaa in laga wadahadlo waa suurtogal, laakin lagama wada hadlayo lahaanshaha dhulka.”
Wasiiru-dowlaha ayaa waxa uu sheegay in hadalka laga soo xigtay Ruto uu yahay mid ku cusub, islamarkaana aysan jirin wax ay ka ogyihiin, isaga oo meesha ka saaray in uu jiro khilaaf ay Jabuuti ku dhex-dhexaadiso Soomaaliya iyo Kenya.
“Uma malaynayo inuu jiro khilaaf jira oo Jabuuti ay maanta xallinayso, mana aysan nagala soo xiriirin, laakiin waxaan aaminsanahay in go’aanka maxkamadda uu yahay mid kama dambays ah. Haddii ganacsi iyo dhaqaale iyo arrimo kale laga wada-hadlayo waa goonideeda,” ayuu yiri.
Marka laga soo tago hadalka wasiiru-dowlaha arrimaha dibadda ee Soomaaliya, dhinaca kale majiro war rasmi ah oo kasoo baxay Jabuuti, kaasi oo la xiriira dhex-dhexaadinta pa sheegay ee Soomaaliya iyo Kenya.
Si kastaba, maxkamadda caalamiga ah ee ICJ ayaa bartamaha sanadkii 2021 waxay dacwadda kiiska badda u xukmisay dhinaca Soomaaliya kadib dhowr sano oo dawcadeeda socota, iyada oo markaas labada dhinac ay ku dacwoonayeen inay leeyihiin qeyb kamid ah badda u dhaxeysa labada waddan oo la sheegay in shidaal laga soo saarayo.
