Mandera (caalamka.net) – Dowladda Kenya ayaa qaaday tallaabo culus oo ay uga jawaabeyso weerarada sii kordhaya ee ay Al-Shabaab ka geysato gobolka Waqooyi Bari.
Wararka ayaa sheegaya in dowladda ay ciidamo dheeraad ah soo dhoobtay deegaanada u dhow xadka ay wadaagaan dalalka Soomaaliya iyo Kenya.
Ciidamadan ayaa si gaar ah uga howlgali doono ismaamullada Gaarisa, Wajeer iyo Mandera oo ka wada tirsan gobolka Waqooyi Bari ee dalka Kenya.
Saraakiisha laamaha ammaanka ayaa sheegay in ciidamadaas ay ka qayb qaadan doonaan qorshayaasha dowladda ee ku aadan sugidda amniga xuduudda labada waddan.
Sidoo kale saraakiisha ayaa ugu baaqay dadka deegaanka inay la shaqeeyaan ciidamada, isla-markaana ay la wadaagaan xogaha ay hayaan, si looga hortago weerarada Shabaab.
Arintan ayaa daba socota hadalkii wasiirka difaaca Kenya oo dhowaan booqday deegaanada dhaca xadka, isaga oo wacad ku maray in halkaasi laga tir tiri doono kooxda Al-Shabaab.
Aadan Barre Ducaale ayaa sidoo kale intaasi ku daray in xittaa Al-Shabaab ay kula dagaalami doonaan gudaha Soomaaliya, si looga adkaado, loona ciribtiro.
Al-Shabaab ayaa weerarada culus ka fulisa gudaha dalka Kenya, kuwaas oo isugu jiro kuwa dhabagal ah iyo qaraxyo miino oo ay la beegsato ciidamada ammaanka ee dalkaasi.
Si kastaba, arrimahan ayaa kusoo aadayo, ayada oo la filayo in uu billowdo wajiga labaad ee dagaalka Shabaab, oo ay ka qayb qaadan doonaan Kenya iyo dalalka kale ee dariska.
