Wasiir Ku-xigeenka Wasaaradda Warfaafinta Dhaqanka iyo Dalxiiska Cabdiraxmaan Sheekh Yuusuf (Al-Cadaala) oo ka qeyb-galayay barnaamij dood ah oo ka baxayay Twitter Space-ka ee warbaahinta Qaranka ayaa sheegay in jab xooggan la gaarsiiyay kooxda.
Al-Cadaala ayaa sheegay in ciidamada Qaranka ay guullo waaweyn ka soo hoyeen howl-gallada socda, ayada oo la xoojiyay howl-gallada toddobaadyadii ugu dambeeyay lagu beegsanayay goobaha muhiimka u ah kooxda Al-Shabaab.
“Khawaarijta jab xoogan ayaa la gaarsiiyay oo waxaa looga dilay tira aad u fara badan oo isugu jira uorjoogayaal iyo maleeshiyaad ka tirsan Khawaarijta,” ayuu yiri Wasiir Al-Cadaala.
Sidoo kale waxa uu xusay in howl-galadii toddobaadyadaan ciidamada ay fuliyeen ahaa kuwa lagu bur-buriyay saanad ciidan iyo gaadiid iyo weliba goobo ay kooxda ku dhuumaaleysanayeen, kuwaasi oo lagu laayay Shabaab badan.
“Howl-galladii ugu dambeeyay maalmahaan waxay ahaayeen in la burburiyo saanadooda iyo hubkooda iyo in la joojiyo isku socodka Khawaarijta,”ayuu hadalkiisa sii raaciyay Wasiir Al-Cadaala
Ugu dambeyntiina waxa uu sheegay in dowladda ay guul badan ka gaartay howl-galka wejiga 1-aad, laguna bur-buriyay isbaarooyin kooxda ay ku qaadan jirtay lacago baad ah, islamarkaana todobaadyada soo socdo ay dhici doonaan howl-gallo xooggan oo ka dhan ah Al-Shabaab.
