Muqdisho (caalamka.net) – Xildhibaan Faa’izo Jayte oo ka tirsan Golaha Shacabka Soomaaliya oo la hadashay warbaahinta ayaa faah-faahin ka bixisay dagaalka kala dhexeeya, guddoomiyaha Golaha Shacabka, Aadan Maxamed Nuur (Aadan Madoobe).
Xildhibaanada ayaa shaaca ka qaaday in guddoonka ay isku hayaan kaliya ilaalinta xeer hoosaadka golaha iyo dastuurka dalka, sida ay hadalka u dhigtay.
Faa’iza Jayte ayaa guddoonka baarlamaanka ku eedeysay inuu dano gaar ahaaneed u adeegsado shuruucda u degsan, taasina ay kasoo horjeedo.
“Wax dagaal ah oo gooni ah oo shaqsi ah oo naga dhexeeyo ma jiraan, kaliya waxaan isku haysanaa xeer hoosaadka noo qoran iyo dastuurka aan kusoo dhaaranay aan ka shaqeyno iyo maalin hala jebiyo, maalintii dan gooniya laga arkana hala isticmaalo” ayey tiri xildhibaam Faa’zo Jayte.
Sidoo kale waxay intaasi ku dartay in guddoomiyaha Golaha Shacabka uu mar kasta ku xadgubo ku dhaqanka xeer hoosaadka golaha, isla-markaana uu jebiyo qodobo muhiim ah, sida ay ku doodday xildhibaamaddu.
“Maalin ilaahey keeno qodob, ama labo ayaa la jebiyaa lagama hadlo markii si dan gaar ah looga leeyahay qof waxaa arkee la siinaayo makarafoonka iyo qof gacan taagtay oo guddoonka u arko inuu culeys ku yahay oo laga tegaayo” ayay mar kale tiri.
Waxa kale oo ay sii raacisay ” Waxyaalaha la doonaayo waxaa waayay in xildhibaanada xuuquuqda hadalka ay si isku mid ah u helaan qof kasta oo farta taago haddii jaanis loo helaayana la siiyo”.
Dagaalka xildhibaanaddan iyo Sheekh Aadan Madoobe ayaa soo shaac baxay Khamiistii lasoo dhaafay, kadib markii uu ka xiray makarafoonka, xilli ay ka hadleysay kulankii baarlamaanka, kadib markii ay adeegsatay erayo adag.
Guddoomiyaha ayaa markaas shaaca ka qaaday in ay u geftay xildhibaanada golaha, waxaana kadib ay bixisay raalli-gelin, ayada oo sidaas kusii wadatay dooddeeda.
