Ra’iisul Wasaaraha ayaa waxa uu sheegay in qof ama koox meel fadhida aan loo dabreyn dalka waxay doonayaan, balse ay soconayaan waxa ay dadka Soomaaliyeed doonayaan.

“Dadka Soomaaliyeed meesha ay ku sii jeedaan ayaa garaneyn anagu, waxa ay doonayaan ayaa garaneyn. Wax hebel iyo hebel uu rabo ma soconeyso, laakiin waxa dadka Soomaaliyeed doonayaan ayaa soconaya,” ayuu yiri ra’iisul wasaare Xamza.

Waxa uu intaas kusii daray “Qof Soomaali ah oo meel fadhiya ama koox waxay doonayaan dalkaan uma dabranaanayo, waa la soconaa.”

Ra’iisul Wasaare Xamza Cabdi Barre ayaa sidoo kale waxa uu sheegay in lasoo gaadhay xiligii ay Soomaalida isku filnaan laheyd oo isku tashan lahaayeen, iskana xoreyn laheyd Al-Shabaab, islamarkaana aan Dastuurkeena dhameystiri laheyn.

“Waa kasoo baxnay qaxooti-nimadii waa inay dhamaayo, gacan hoorsigii waa inuu dhamaado, khilaafkii waa inuu dhamaado, duleysigii Shabaabka iyo madax hoos u foorarintii waa inay dhamaato oo dowladnimadii naga bilaabata, illaa goorma sugeyna.”

“Haddaa hore usoo khaldannay maantaba in aan dhinac kale usii boodno ma ahan. Wixii maanta naga halaaba dadkeena dambe ayuu ka halaabaya. Dacaayadaha iyo mashaakilku ha iska socdaan, dalkaan waxaa dhaafin kara meeshaan qof lagu dhagan yahay oo hiigsigiisu cad yahay.”

Ra’iisul Wasaaraha ayaa ugu dambeyntiina waxa uu ka dhawaajiyay in marjaca u dambeeya ee go’aanada Golaha Wadatashiga Qaranka uu yahay Baarlamaanka, oo isagu saxaya haddii ay dhacdo inuu wax khaldo, hase yeeshe aan cid kale loo joojineyn, sida uu hadalka u dhigay.

“Cabsida badan ha la iska daayo wixii Madasha Qaranka ay soo gaadho Baarlamaanka ayay kusoo dhamaane, hadda qaldano Baarlamaanka hana saxo, marka waxa mashaakilka keenay muxuu yahay. Waxaa laga cabsanayaa un in aan dhaqaaqno.”