Baydhabo (caalamka.net) – Ergeyga Gaarka ah ee Madaxweynaha JFS u qaabilsan Arrimaha Somaliland, Cabdikarim Xuseen Guuleed ayaa si weyn loogu weeraray kulamada wadatashi ee uu ka wado maamulka Koonfur Galbeed.
Ergey Guuleed ayaa maanta kulamo wadatashi ah la qaatay qaar ka mid ah ururada bulshada rayidka iyo odayaasha dhaqanka dowlad-goboleedka Koonfur Galbeed.
Kulankaas ayaa ergeyga madaxeynaha waxa uu dhinacyadaas uga dhageystay arragtiyooyinka iyo fikradaha ay ka qabaan dib u billaabidda hanaanka wada-hadallada dowladda federaalka Soomaaliya iyo Somaliland.
Ergeyga ayaa xubnaha ka qeyb-galay kulanka uga warbixiyay sooyaalka wada-hadallada iyo muhiimadda ay ugu fadhiyaan umadda Soomaaliyeed, waxaana intaasi kadib uu ka dhageystay arragtiyadooda, iyagoona soo gudbiyay tallooyin wax tar u leh qorshaha wada-hadallada, sida uu sheegay xafiiska ergeyga gaarka ah ee mdaxweynaha u qaabilsan arrimaha Somaliland.
Haddaba, Sidee ayaa tallaabadan loogu weeraray ergey Guuleed?
Bashiir Ibraahim Xasan: “Hantidii reer Koonfur Galbeed looga dhacay Somaliland kasoo celi haddaa ergey loo magacaabay Soomaaliya aad tahay.”
Cabdi Cali Raageayaa isna waxa uu yiri: “Shaqo la’aan badanaa awalba mushaar ayaa lala rabay ee ergey ma aheyn.”
Sharmaarke oo kamid ah dadka sida weyn u weeraray ergey Guuleed ayaa waxa uu yiri “– Soomaalidu ninkay waxaraha kala quusato ayay geela raacsataa.”
“Ergey beela nin mushaar si loogu qoro la waayey dheh,” ayuu yiri Cabdirisaaq Ibraahim Camoow oo isagu dhaliilsan hanaanka uu wax u wado ergeyga.
Maxamed Shaaleayaa isna yiri: “Wax aan loo baahneyn ha ku daba wareeganin awalba si mushaar lagugu qora unbaa la rabey tiiba dhacdey in lagu magacaabo xilkaas. Aad Somaliland koley waxba kama qabaneysee, Koonfur Galbeed Soomaaliya dagaal kalama dhaxeeyo.”
Axmed Maxamed Dakare: “Koofur Galbeed maxaa ka yaal war orod Burco iyo Hargeysa tag ayaagaa laguu diree. Magac uyaal lama rabee.”
“Konfur Galbeed ha ku meereysan ee SSC aad ku dhaha,” ayuu yiri Maxamed Cali oo kamid ah dadka ka fal-celiyay tallaabada uu maanta qaaday Ergeyga gaarka ah ee madaxweynaha u qaabilsan arrimaha Somaliland.
