Golaha ayaa marka hore si xoogan u cambaareeyay dagaalkaasi oo sababay dhimasho iyo dhaawac soo gaaray askar iyo dad shacab ah
Sidoo kale waxa ay golaha wasiiradu tacsi u direen ehellada ay dadkooda ku dhinteen dagaalkaas oo u dhexeeyay ciidanka Puntland iyo kuwa taabacsan mucaaradka.
“Golaha Wasiirada Dowladda Puntland wuxuu ka xunyahay oo cambaareynaya dhacdadii ka dhacday Garoowe 20-kii June 2023, Isagoo ka tacsiyeeyay dhammaan dadkii ku geeriyooday dhacdadaasi, waxaana uu Goluhu caafimaad degdeg ah u rajeeyay dadka dhaawacmay,” ayaa lagu yiri warsaxaafadeed kasoo baxay shirka golaha wasiiradu.
Golaha ayaa sidoo kale ku baaqay in la illaaliyo nabada, kala dambeynta iyo dowladnimada, si looga hortago wax kasta oo liddi ku ah dowlad goboleedka Puntland.
Dhanka kale golaha wasiirada oo isla gorfeeyay sida ay wax u dhaceen ayaa iska fogeeyay mas’uuliyadda dagaalkii ka dhacay Garoowe, waxaana xubnaha golaha ay shaaca ka qaadeen in xukuumadu ay muddo dheer dadaal ku bixisay in deganaan loo wadahadlo.
“Sida la wada ogsoonyahay Dowladda Puntland waxay bilihii u danbeeyay dadaal ku bixinaysay sidii wadahadalo nabadeed loogu dhameyn lahaa arrimaha taagan, welina diyaar ayeey u tahay.” ayaa mar kale lagu yiri warsaxaafadeedka ay soo saartay xukuumadda.
Waxa kale ay ka digtay xukuumaddu in mar kale ay Garoowe ka dhacaan rabshado keeni kara khal-khal amni, maadaama haatan dhaq-dhaqaaqyo laga dareemayo magaaladaasi.
“Waxay dowladdu ka digeysaa wax kasta oo keeni kara khalkhal gelin Bulsho, sida dadka faafinaya dacayaadka iyo qixinta dadweynaha” ayaa lagu soo gabagabeeyay qoraalka.
Bayaankan kasoo baxay golaha wasiirada Puntland ayaa kusoo aadayo, xilli ay haatan socdaan wadahadallo la doonayo in lagu xaliyo xiisadda weli ka taagan maamulkaasi.
