Muqdisho (caalamka.net) – Ra’iisul Wasaaraha Soomaaliya Mudane Xamza Cabdi Barre ayaa lagu weeraray sidii uu uga hadlay weerarkii is-miidaaminta ahaa ee ka dhacay Xerada Kulliyadda Jaale Siyaad ee Muqdisho.
Xamza oo haatan ku sugan dalka Tanzania ayaa si aan laga filaneyn uga hadlay weerarkaasi, isaga oo hadal jeedintiisa kusoo koobay tacsi uun, taasi oo uu diray ehellada askartii lagu waayay weerarkaas oo ay sheegatay kooxda Al-Shabaab.
“Waxaan rabaa inaa ku bilaabo tacsi aan u dirayo geesiyadeenii shalay ee dhibaatadu ku dhacday ee nimankii fuleeyada ahaa mid kamid ahi uu isku dhex qarxiyay, deedna uu culeys kasoo gaaray qaar kamid ah ciidamada xoogga dalka Soomaaliyeed,” ayuu yiri.
Sidoo kale wuxuu raaciyay “Intii dhimatay Allaha u naxariiriisto inta dhaawaca ahna Ilaahey ha u boogo dhayo dhammaan Ummadda Soomaaliyeed falkaas waan uga tacsiyeyneynaa”
Marnaba ra’iisul wasaaruhu sooma hadal qaadin tallaabada ay qaadeyso xukuumaddiisa ee ku aadan shakiga ka dhashay weerarkan, maadaama uu ka dhex dhacay xero ciidan oo si weyn amnigeeda loo ilaaliyo, laguna dilay askar badan oo ka tirsan dowladda federaalka.
Haddaba, Sidee ra’iisul wasaaraha loogu weeraray arrintaan?
Axmed Xaaji: “Sanbuuse laga adimay cidna ma rabto xilligan maad soo toostay Raysal-wasaare.”
Cubayd Cabdi Nasir ayaa isna waxa uu yiri: “Ra’iisul Wasaare tan hada lama rabe waxna ma tareyse kuwa hada qirtay inay ilmaha halige koleyba waa sarkaallo ee shaqo ka qabo oo mudankooda marsii.”
“Hooyooyinka Soomaaliyedna caloosha u qabooji hadaad dalkan iyo dadkaanba wax u tareeyso.”
“Tacsi miyaad wadeysaan? War amniga wax ka qabta,” ayuu yiri Cumar Ashraf Shariif.
Mahad Yusuf Xaji Kaahin oo isaguna si weyn u dhaliilsan ra’iisul wasaaraha ayaa yiri: “Waa tacsi soo daaday.”
Axmed Maxamud Nuur: “Ra’iisul Wasaare hadii uu dhiig Somalinimo kugu jiro Sarkaalkii lagu helo hadaan horay laga tooganeyn waa ciyaar waxa socdaa.”
“Ra’iisul Wasaare Xamza Cabdi Barre Allaha ku xafido ee ka shaqee inaad Soomaali ka samata-bixiso dhibaatadii 32 sano ay lasoo daala-dhacayeen,” ayuu yiri Daa’uud Xasan.
Cabdullaahi Dirir: “Ra’iisul Wasaare waad soo daahdey hada looma baahna.”
Si kastaba, Weerarkii Kuliyadda Jaalle Siyaad oo ahaa is-miidaamin ayaa waxaa fuliyay naftii halige Shabaab ah oo galay xerada, xilli ay safaf dhaadheer ku jireen ciidamo ka tirsan kuwa xoogga dalka, gaar ahaan guutada 14-ka October ee fadhigoodu yahay Marka, waxaana ka dhashay khasaare xooggan oo isugu jira dhimasho iyo dhaawac.
