Jeddah (caalamka.net) – Safiirkii dhawaan is-casilay ee Soomaaliya u fadhiyay dalka Sacuudi Carabiya ayaa xilkii si rasmi ah u wareejiyay, sida uu Danjiraha ku shaaciyay qoraal uu soo saaray.
Danjire Saalim Macow Xaaji ayaa xilkii safaaradda Soomaaliya ee Sacuudiga ku wareejiyay sii-haya xilka, Mudane Abshir Warsame.
Saalim ayaa uga mahad-celiyay dhamaan Jaaliyadda Soomaaliyeed ee ku nool dalka Sacuudiga, howl-wadeenada safaaradda, Qunsliyada Guud ee Jeddah iyo weliba munduubiyada OIC, sidii ay ula shaqeeyeen muddadii uu ku sugnaa Sacuudiga, uuna hayay xilka safaaradda.
Saalim Macow Xaaji ayaa dhawaan is-casilay, kadib markii uu si weyn uga cowday Hinda Culusow oo ah madaxa hab-maamuuska madaxweyne Xasan Sheekh Maxamuud.
Danjire Saalim ayaa qoraal uu hore u soo saaray uga andacooday in laga reebey ka qeyb-galka shirka 32-aad Jaamacada Carabta oo lagu qabtey magaalada Jeddah maalinta 19-ka May, 2023.
“Arintan waxey baalmar ku tahay curfiga diblomaasiyada caalamka oo ah in safiirka dalka martida loo yahay inuu ka mid noqdo shirarka lagu qabanaayo dalkaasi ee uu madaxweynaha ka qeyb galaayo,” ayuu ku yiri qoraalka.
Waxa uu intaas ku daray “waxaan caddeynayaa in madaxa barotokoolka madaxweynaha Hinda Culosow iila dhaqantey si akhlaaq xumo ah, iina geysatey aflagaado.”
Waxa uu sheegay inuu arrintaasi la socodsiiyey wasiirka arrimaha dibadda, balse wasiir Abshir Cumar Huruse uu ka gaabsadey inuu arrintaasi faragelin ku sameeyo.
Arrimaha uu safiirka sheegay waxaa sidoo kale mid ah inuu yiri “in leyga ilaalinaayey inaan si gaar ah u arko madaxweynaha oo mar kastaba leyga hor istaagaayey inaan u galo meesha ay wafdiga intooda kalena si toos ah loogu fasaxey.”
Si kastaba, waxaa xusid mudan in safiir Saalim Macow uu kamid yahay shaqsiyaadka aad ugu dhow madaxweynihii hore ee Soomaaliya Maxamed Cabdullaahi Farmaajo, islamarkaana la hadal hayey in la beddeli doono.
