Hargeysa (caalamka.net) – Maxkamadda Darajada 1-aad ee Ciidamada Somaliland ayaa xukun adag ku riday nin ay sheegtay in lagu helay inuu ka tirsan yahay kooxda Al-Shabaab.
Ninkan oo lagu magacaabo Faysal Cali Ibraahin ayaa waxay maxkamaddu sheegtay in kooxda Al-Shabaab u qaabilsanaa in xubno Al-Shabaab ah ka diyaariyo gudaha Somaliland.
Maxkamadda ayaa Faysal oo 42 jir ah ku riday xukun 9 sanno oo xabsi milatari, sida lagu shaaciyay warqad kasoo baxday Xafiiska Xeer Ilaaliyaha Guud ee ee Ciidamada Somaliland.
“Maxkamadda darajada 1-aad ee Ciidamada JSL ee goboladda galbeedku waxay xukun 9 (Sagaal Sano) oo ah xabsi milatari ku riday danbiile-Al-Shabaab Faysal Cali Ibraahin Ina Aamina Aadan oo 42 jir ah oo Al Shabaab ka tirsan,” ayaa lagu qoraalka Xeer Ilaalinta.
Xukunkan ayaa imanaya xilli Booliska Somaliland uu dhawaan sheegay inuu soo qabtay xubno looga shakiyay Al-Shabaab-nimo, lamana oga in ninka la xukumay uu kamid ahaa kooxdaasi la qabtay iyo inkale.
Dhawaan unbay aheyd markii xukuumadda Somaliland ay shaacisay inay fashilisay weerar argagixiso, kaasi oo ay sheegtay inuu ahaa qarax is-miidaamin ah.
Si kastaba, Somaliland ayaa sheegtay in aysan ogolaan doonin in falalka argagixisada ay carqaladeeyaan xasiloonida iyo horumarka ay gaadhay, islamarkaana ay ciidamadeedu ay si joogto ah ugu taagan yihiin ilaalinta muwaadiniinta iyo xaqiijinta ammaankooda.
