Khartoum (caalamka.net) – Wakiilo ka socda Suudaan ayaa gaaray magaalada Jeddah ee dalka Sacuudiga si ay dib u billaabaan wada-hadallada ay la leeyihiin Jabhadda Rapid Support Forces (RSF), kaddib saddex bilood oo dagaal uu dhexmaray ciidammada iyo RSF.
Wada-hadaladii hore ee Jeddah oo ay fududeeyeen Sacuudi Carabiya iyo Mareykanka ayay labada dal hakiyeen horraantii bishii June kadib markii dhowr jeer la jebiyey xabbad-joojinta.
Sucuudiga iyo Mareykanku wali ma aysan xaqiijin in dib loo bilaabayo wada-hadalka u dhaxeeya dhinacyada isku haya Suudaan.
Dhanka kale, isku day dhex-dhexaadin ah oo Masar ay bilowday Khamiistii, ayaa waxaa soo dhaweeyay militariga Sudan oo xiriir dhow la leh Masar iyo RSF.
Maalin kahor ayay aheyd markii hay’adaha xuquuqul insaanka ee Suudaan ay shaaciyeen inay heleen cadaymo ay kooxda Rapid Support Forces (RSF) ku xirtay caasimadda in ka badan 5,000 oo qof.
Dadkaas ayay sheegeen inay ku hayeen xaalado bini’aadantinimo ka baxsan, sida ay kooxdu u sheegtay wakaalada wararka ee Reuters.
RSF ayaa muddo saddex bilood ah dagaal kula jirtay ciidamada Suudaan, iyagoo inta badan heysta caasimadda Sudan. Dadka deegaanka ayaa ciidamada ku eedeeyay inay dhac iyo boob u geysteen guryaha.
Mar wax laga weydiiyey RSF waxa ay sheegtay in wararkaasi ay yihiin kuwo aan jirin, islamarkaana ay hayaan maxaabiis dagaal oo si wanaagsan loola dhaqmay.
Dadka lagu xiray dhowr goobood oo ku yaalla magaalada Khartoum ayaa waxaa ka mid ahaa dagaal-yahanno, balse sidoo kale 3,500 oo rayid ah oo ay ku jiraan haween taag daran iyo ajaaniib, sida ay hadaha xuquuql insaanka u sheegeen dad codsaday in magacyadooda la qariyo cabsi ay ka qabaan in la ciqaabo darteed.
Xafiiska xuquuqul insaanka ee Qaramada Midoobay ayaa sheegay in ugu yaraan 87 qof lagu aasay xabaal wadareed ku yaalla magaalada El Geneina ee gobolka Darfur, isaga oo ku eedeeyay RSF iyo maliishiyaadka xulafada ah inay dilka geysteen.
