Muqdisho (caalamka.net) – Xildhibaanada Golaha Shacabka Soomaaliya ayaa maanta guda galay dooda ku aadan wax ka beddalka dastuurka KMG ah, gaar ahaan muddo xileedka madaxweynaha iyo labada Aqal oo haatan la gaarsiinayo illaa 5 sanno.
Xildhibaanada ayaa si weyn uga hadlay mooshinkan oo soo billowday bishii Febraayo sanadkan, kaas oo loo xil-saaray guddi uu horkacayo xildhibaan Mahadi Guuleed.
Ugu horreyn guddoomiye ku xigeenka labaad ee Golaha Shacabka, Cabdulaahi Cumar Abshirow oo kulanka ka hadlay ayaa meesha ka saaray in ka doodista mooshinkan uu waqtiga ka dhacay, waxaana uu tilmaamay in doodiisa lasii wadayo laga inta go’aaminayo.
“Mooshinkan waqtigiisu ma dhicin, kalfadhigii hore ayay ahayd in la keeno laakiin waxaa ka xirmay kalfadhiga sidaas darteeda waxaan rajeynayaa in Xildhibaanada ay ku qancaan. Mooshinka maanta go’aan lagama gaarayo balse waxaa laga dood” ayaa ka yiri Abshirow.
Xildhibaan Cabdiraxmaan Cabdishakuur oo sidoo kale ah ergeyga madaxweynaha ee arrimaha bani’aadanimada ayaa ka horyimid mooshinkan wax looga beddalayo dastuurka, wuxuuna tilmaamay inuu wiiqayo dagaalka adag ee haatan lagula jiro kooxda Al-Shabaab.
“Mooshinkan waxaa ku jira ajandayaal lagu wiiqayo dib u xorreynta dalka, isaga dhan hala laalo, sababtoo ah muddo koroorsi nafteenaa halis u gashay, suuragalna maaha in maanta shaqo laga billaabo” ayuu yiri xildhibaan Cabdiraxmaan Cabdishakuur Warsame.
Sidoo kale Xildhibaan Xasan Cabdi Ismaaciil ayaa sharci darro ku tilmaamay wax ka beddalka dastuurka, waxaana uu tilmaamay inuu billow u yahay muddo kororsi horleh.
“Mooshinkan wax ka badalka dastuurka sharci ma ahan, waa xaaraan mana waafaqsan dastuurka, waxaana muuqata in uu horgal u yahay [muddo kororsi] sharci darro ah. Hal sano ayaan banaanka joogay aniga oo muddo kororsi diidayo. Haddii ay daruur keeneyso waa in loo maraa habraaca saxda ah” ayuu isna yiri Xildhibaan Xasan Cabdi Ismaaciil.
Dhankeeda Khadiijo Maxamed Diiriye oo xildhibaan iyo wasiir isku ah ayaa soo jeedisay in la taageero mooshinka, kadibna loo codeeyo.
“Maanta mar haddii aad soo bandhigteen mudane guddoomiye waa sidii la rabay waxayna ila tahay inaan sida uu yahay aan ugu codeyno” ayuu tiri Khadiijo Diiriye.
Xildhibaan Cabduqaadir Cosoble ayaa isuguna sheegay in la damacsan yahay in mooshikan lagu ijaafeeyo xildhibaanada Soomaaliyeed, laguna rabo mooshin boor isku qaris ah.
Mooshinkan waxa uu horudhac u yahay waxyaabo la rabo in lagu ijaafeeyo Xildhibaanada oo laga dhigo in ay muddo kororsi raadinayaan” ayuu yiri xildhibaan Cosoble.
Dooda xildhibaanada ayaa weli socota, waxaana kulankan uu ku soo aaday, xilli xasaasi ah oo heshiis siyaasadeed ay doorashooyinka ka gaareen xubnaha Golaha Wadatashiga Qaran.
