Waxaa maalmihii dambe si weyn baraha bulshada loogu baahinayay in la dayacay Xujeydii Soomaalida aheyd oo meelo cidla ah looga tegay, xilli dowladda ay ku faantay in sanadkaan meesha laga saaray musuq-maasuqii adeega Xajka
Haddaba, Waa sidee xaaladda Xujeyda Soomaalida ah iyo waxa ka jira dayaca la sheegay?
Weriye Xasan Cabdi (Xasan Yufle) oo kamid ah Soomaalida sanadkaan xajineysa oo la hadlay VOA ayaa waxa uu sheegay in Xujeyda Soomaalida ay heleen adeeg aad u wanaagsan, islamarkaana la dejiyay meelo u dhow Mina.
“Adeeg fiican oo wanaagsan ayaa loo sameeyay Xujeyda. Runtii waxaa Soomaalida la dejiyay huteello aad u wanaagsan oo isku xiga, sida u soo gaadhana waa fududaaneysay. Qofka xilli kasta oo uu soo kaco Xaramka waa uu haleelayay,” ayuu yiri Xasan Yufle oo u waramay VOA.
“Qof meel looga tegay oo la dayacay ma arkin. Iyada oo baska uu jiray oo xilli kasta heegan yahay ayaa dadka Soomaalida qaar taksi raacayay, waxay u raacayaan qof caafimaad u socda, qof suuqa kasoo adeeganaya ama qof qaraabadiisa soo booqanaya.”
Sidoo kale waxa uu meesha ka saaray muuqaal si weyn loogu baahiyay baraha bulshada, “Dadka lasoo duubay ee baraha bulshada lasoo dhigay ee la yiri Soomaalida waxay tuugsaneysa taksiile waa been.”
“Maalintii 8-deed ee Dul-Hijjah ayaa nidaam xumo yar dhacday oo Soomaalida waa iska taqaana oo qof walba wuxuu isleeyahay yaan laga tegin. Markii dadkii si nidaam darro ah u koreen basaska waxay sababtay in markii la tegay Mina in dadka qaar meeshii loogu tala-galay waayeen.”
Waxa uu ka dhawaajiyay in Xujeyda Soomaalida qaarkood ay seexdeen banaanka, markii la tegay Mina, taasi oo uu sheegay inay sababtay nidaam darro ka dhalatay qaabkii Soomaalida usoo raaceen basaskii loogu tala-galay.
“Waa jireen dad banaanka ku baryay oo qoraxda seexday, laakiin sababta keentay waxay aheyd nidaam darada baska lagu koray,” ayuu yiri Xasan Yufle.
Hoos ka dhageyso wareysiga
