Maqnaanshaha daba dheeraaday ee Qin ayaa abuuray xan badan oo ku saabsan halka uu jiro, wuxuuna mar kale tooshka ku ifiyey dhaqanka mugdiga badan ee Xisbiga Shuuciga ah (CCP) ee Shiinaha.

Goormaa u dambeysay oo la arkay Qin?

Qin laguma arag fagaare tan iyo June 25, markaasi oo uu wada-hadallo la yeeshay dhiggiisa dalalka Ruushka, Vietnam iyo Sri Lanka.

Muuqaalkii ugu dambeeyey ee Qin ee warbaahinta dowladda ayaa ahaa kulan uu la qaatay wasiir ku-xigeenka arrimaha dibedda Ruushka Andrey Rudenko, kaasi oo booqday Beijing wax ka yar 48 saac kadib kacdoonkii ay sameeyeen kooxda Wagner.

Wixii markaas ka dambeeyey, Qin oo wasiirka arrimaha dibedda loo magacaabay December, ayaa ka maqnaa kulamo diblomaasiyadeed oo heer sare ah oo ka dhacay Beijing.

Qin ayaa lagu waday inuu la kulmo madaxa siyaasadda arrimaha dibedda Midowga Yurub Josep Borrell 4-tii July, hase yeeshee saraakiisha Midowga Yurub ayaa ku dhowaaqay in China ay baajisay wada-hadallada sharaxaad la’aan, ayada oo maalmo kahor un soo sheegtay.

Qin ayaa kadib ku guul-darreystay inuu ka qeyb galo kulamo si aad ah isha loogu hayey oo uu la yeelan lahaa xoghayaha maaliyadda Mareykanka Janet Yellen iyo ergeyga cimilada u qaabilsan Mareykanka John Kerry.

Intii uu socday kulanka wasiirada arrimaha dibedda ururka dalalka koonfur bari Asia ee ASEAN ee Jakarta ka dhacay toddobaadkii tegay, China ayaa waxaa matalay Wang Yi, oo xilka wasiirka arrimaha dibedda kaga horreeyey Qin, balse uga darajo sarreeyaa xisbiga CCP.

Wasaaradda arrimaha dibedda Shiinaha ayaa xilligaas sheegtay in maqnaanshaha Qin ay ugu wacan tahay “sababo caafimaad” hase yeeshee sharaxaaddaas ayaa laga reebay qoraalka rasmiga ah.

Wixii markaas ka dambeeyey saraakiisha Shiinaha ayaa ka leex-leexanayey su’aalo la xiriira caafimaadka Qin iyo halka uu ka baxay.

Daah-furnaan la’aanta Beijing ayaa abuurtay xan badan oo ka taagan gudaha iyo dibedda Shiinaha, oo ay ku jiraan warar sheegaya in Qin ay isku dhaceen hoggaanka Shiinaha.

Si kastaba Qin ayaa weli wuxuu website-ka wasaaradda arrimaha dibedda ugu qoran yahay inuu yahay wasiirka arrimaha dibedda.

Waa maxay asalka Qin?

Qin, oo ah diblomaasi rug caddaa ah, ayaa muddo loo arkay inuu aad ugu dhow yahay madaxweynaha Shiinaha Xi Jinping, islamarkaana xiddig soo kacaya ka yahay xisbiga CCP.

57 jirkan kasoo jeeda gobolka Tianjin ayaa u shaqeynayey dowladda Shiinaha tan iyo 1980-maadkii, isaga oo badanaa qaban jiray doorar la xiriira arrimaha dibedda.

Ka hor inta aan loo magacaabin wasiirka arrimaha dibedda, Qin wuxuu soo qabtay xilal kala duwan oo diblimaasi, oo ay ku jiraan wasiir ku-xigeenka arrimaha dibedda, afhayeenka wasaaradda arrimaha dibedda iyo xilal kala duwan oo uu ka qabtay safaaradda China ee UK.

Qin waxa kale oo uu madax ka ahaa waaxda hab-maamuuska 2014-2017, isaga oo u xil saarnaa qabanqaabada socdaallada Xi ee dibadda iyo in uu aad ugu dhow yahay hoggaamiyaha Shiinaha.

Dhawaan, Qin waxa uu 11 bilood safiir ka ahaa Maraykanka, halkaas oo magacaabistiisa si weyn loogu fasiray calaamad muujinaysa in Xi uu laba jibaaray diblomaasiyadda “dagaal-yahan”.

Intee in le’eg ayaysan caadi aheyn waayitaanka Qin?

Caadi ma ahan in dadka darajada sare ee Shiinaha la waayo muddo dheer iyada oo aan sharraxaad laga bixin, in kasta oo sannadihii ugu dambeeyay arrintan ay ku badneyd ganacsatada iyo dadka caanka ah marka loo eego siyaasiyiinta.

Aasaasaha Alibaba Jack Ma, atariishad Fan Binging iyo ciyaaryahanka Tennis-ka Shiinaha ee Peng Shuai ayaa ka mid ah dad badan oo caan ah oo laga waayey fagaarayaasha sannadihii u dambeeyay.

Xaaladaha qaarkood, shakhsiyaad caan ah ayaa dib u soo noqday bilo ama xitaa sanado ka dib si loogu eedeeyay dambiyo.

Nidaamka cadaalada ee Shiinaha waxa uu leeyahay heer xukun dambi ku helista ay ku dhowdahay boqolkiiba 100, saraakiishuna waxay si joogto ah ugu diidaan tuhmanayaasha inay helaan matalaad sharci ama inay la xiriiraan caalamka.