Muqdisho (caalamka.net) – Dowladda Federaalka Soomaaliya ayaa dhaqaale badan ka sameysa hawada Soomaaliya, kadib markii ay ku guuleysatay inay si buuxda ula soo wareegto maamulka hawada dalka, sanadihii 2018 iyo 2019-kii.
Celcelis ahaan sanad kasta waxay dowladdu hawada dalka ka soo xareysaa lacag dhan $22 milyan, waxaana socda koror uu sameynayo kharashka dowladda ka soo gala hawada dalka.
Horay waxaa hawada Soomaaliya u maamuli jirtay Qaramada Midoobay, dhaqaalaha laga helana wuxuu toos ugu dhici jiray qasnadda QM. Lacagtaas inta badan kuma soo noqonayn Soomaliya, marka laga reebo qaar ka mid ah garoomada dalka oo Qaramada Midoobey ay dhistay.
Lacag cayiman oo tiradeeda la hubo lama hayo, laakiin waxaa la qiyaasayaa in ugu yaraan sannadkii hawada Soomaaliya laga heli jiray lacag $12 milyan gaaraysa oo ku dhici jirtay qasnadda Qaramada Midoobey.
Bisha June ee sannadkan hey’adda duulista hawada Soomaaliya waxay qorshaynaysaa in dhaqaalaha laga helo diyaaradaha mara hawada Soomaaliya ay gaarto $29 milyan.
Sidoo kale hey’addu waxay sheegtay in sanadba, sanadka ka dambeeya la hiigsanayo inuu sii kordho dhaqaalaha ka soo xarooda hawada Soomaaliya.
Markii ay Soomaaliya la soo weegeysay maamulka hawada waxaa 24-kii saacba hawada Soomaaliya mari jiray diyaarado gaaraya 220, balse hadda waxaa mara ku dhawaad 500 oo diyaaradood oo kuwa degaya aysan ku jirin.
Diyaaraha hawada maraya waxa ay bixiyaan lacag, iyadoo ay ku xirantahay nooca iyo tankeeda, tusaale ahaan diyaaradaha Boeng 777 iyo Airbus 350 waxaa laga qaadaa lacag dhan $395 markiiba.
Lacagahaas waxay ku dhacaan bangiga dhexe ee Soomaaliya, waxayna dowladdu uga faa’ideysataa adeegyadeeda, sida bixinta mushaaraadka shaqaalaha iyo ciidanka.
Sannadkii 2018 ayay Soomaaliya dib ula soo wareegtay maamulka duulista hawada. Sanad kadibna 2019-kii waxay mar kale lasoo wareegtay dhaqaalaha laga helo hawada Soomaaliya, kaas oo hadda si toos ah ugu dhaca bangiga dowladda.
Sannadkan billowgiisii, kaddib markii shuruucda maamulka hawada Soomaaliya la dhammasytiray hay’adda duulisata hawada Soomaaliya waxaa loo aqoonsaday in ay noqoto Class A, halka ay markii hore ka hayd Class G.
Qiimeyntaas waxay muujineysaa in hay’addu ay si heerkeedu sareeyo u maamuli karto hawada dalka, iyadoo isticmaalaysa qalab casri ah, sidoo kalena ay kordhayaan lacagaha laga qaado diyaaraha isticmaala hawada Soomaaliya, taas oo sahashay in dhaqaalaha hawada uu mar kale kordho.
